Fréttir af starfi GA 6.desember

Þrátt fyrir að Jaðarsvöllur hafi lokað um miðjan október þýðir það ekki að starfsmenn GA hafi setið auðum höndum síðan.

Mikil og góð vinna hefur verið í gangi út á velli en um þessar mundir hafa vallarstarfsmenn okkar unnið að nýjum "rauðum" teigum á 2. og 8. braut. Á 2. braut var teigurinn færður frá tjörninni og á 8. braut styttist holann töluvert með nýrri staðsetningu. Sjá meðf. myndir. 

Lagðar voru drenlagnir fyrir framan 1. flötina með niðurföllum til að fanga yfirborðsvatn sem rennur niður brekkuna í átt að flöt. Eins var farið í drenvinnu sem enn stendur yfir á 3. braut og verður klárað á vordögum.

Okkar frábæru sjálfboðaliðar hafa svo unnið hörðum höndum í vinnu í Klöppum, þétta hurðar og þakrennur settar á suðurvegg ásamt boltavörnum við útveggi bása.

Þá standa Tumi Hrafn og Andrea Ýr í ströngu með liðum sínum í háskólagolfinu út í Bandaríkjunum og eru þau að standa sig vel.

Western Carolina, liðið hans Tuma, endaði í 7. sæti á Carolina Colligate Invitational Open um miðjan október og spilaði Tumi þar á 75-74-69 og endaði í 28. sæti af 83 keppendum. Í lok október var síðan komið að Battle at Black Creek þar sem Western Carolina endaði í 4. sæti af 18 skólum. Tumi spilaði á 78-69-78 og endaði í 57. sæti. Næsta mót hjá Tuma er síðan í febrúar og munum við halda áfram að flytja frekari fréttir af honum. 

Elon, liðið hennar Andreu, lenti í 2. sæti á öðru móti vetrarins og gerði sér svo lítið fyrir og sigraði á Aggie Invitational sem var næsta mót. Keppt var í holukeppni og spilaði Andrea alla þrjá leikina fyrir sitt lið. Í fyrstu umferð vann hún 3/2, síðan tapaði hún 5/4 og vann svo lokaleikinn sinn í úrslitunum 3/2. Frábær árangur hjá Andreu og hennar liði. Um miðjan október keppti síðan skólinn á Chris Banister Golf Classic og endaði í 2. sæti. Andrea spilaði á 81-82-84 og endaði í 31. sæti.